பொள்ளாச்சி வழித்தடத்தில் முன்பதிவில்லா சிறப்பு ரயில்கள் இயக்கம்

பொள்ளாச்சி வழித்தடத்தில் முன்பதிவில்லா சிறப்பு ரயில்கள் இயக்கம்

10ஆம் தேதி முதல் கோவை போத்தனுார்-பொள்ளாச்சி வழித்தடத்திலும், பொள்ளாச்சி - பாலக்காடு இடையே முன்பதிவில்லா எக்ஸ்பிரஸ் சிறப்பு ரயில்கள் இயக்கப்படுவதாக தெற்கு ரயில்வே அறிவித்துள்ளது.

 

போத்தனுார்-பொள்ளாச்சி இடையே, 40 கி.மீ., அகல ரயில் பாதையில், தற்போது மின்மயமாக்கல் பணிகள் முழுமையாக முடிவடைந்துள்ளன. போத்தனுார்-பொள்ளாச்சி வழித்தடத்தில், சுமார் 17 மாதங்களுக்கு மேலாக ரயில்கள் இயக்கப்படவில்லை. பயணிகளின் நீண்ட நாள் கோரிக்கைக்குப் பின் தற்போது, கோவையில் இருந்து போத்தனுார், பொள்ளாச்சி வழியாக பழையபடி ரயில்சேவை துவங்கப்படுகிறது.

கோவையில் இருந்து, வரும் 10ஆம் தேதி முதல் தினமும் மதியம், 2:10 மணிக்கு புறப்படும் முன்பதிவில்லா எக்ஸ்பிரஸ் சிறப்பு ரயில் (06463), போத்தனுார், கிணத்துக்கடவு, பொள்ளாச்சி, கோமங்கலம், உடுமலை ஸ்டேஷன்கள் வழியாக மாலை, 4:40 மணிக்கு பழநி அடைகிறது. 11ஆம் தேதி முதல் காலை பழநியில் இருந்து 11:15 மணிக்கு புறப்படும் ரயில் (06462), மதியம் 2 மணிக்கு கோவை சென்றடைகிறது.

10ஆம் தேதி முதல், பழநியில் இருந்து தினமும் மாலை 4:45 மணிக்கு புறப்படும் ரயில் (06479), இரவு 7:40 மணிக்கு மதுரை அடைகிறது. மதுரையிலிருந்து, 11ஆம் தேதி முதல் தினமும் காலை, 7:20 மணிக்கு புறப்படும் ரயில் (06480), காலை, 10:10 மணிக்கு பழநியை   சென்றடைகிறது. கோவையில் இருந்து வரும் 13ஆம் தேதி முதல் தினமும் மாலை, 6:15 மணிக்கு புறப்படும் முன்பதிவில்லா எக்ஸ்பிரஸ் ரயில் (06419), போத்தனுார், கிணத்துக்கடவு வழியாக இரவு, 7:45 மணிக்கு பொள்ளாச்சி சென்றடைகிறது.

14ஆம் தேதி முதல் பொள்ளாச்சியில் இருந்து காலை 7:25 மணிக்கு புறப்படும் ரயில்(06420) காலை, 8:40 மணிக்கு கோவை செல்கிறது. 14ஆம் தேதி முதல் பாலக்காட்டில் இருந்து காலை, 4:55 மணிக்கு புறப்படும் ரயில் (06731) பாலக்காடு டவுன், புதுநகரம், கொல்லங்கோடு, முதலமடை, மீனாட்சிபுரம் வழியாக காலை, 6:30 மணிக்கு பொள்ளாச்சி வந்தடைகிறது. பொள்ளாச்சியில் இருந்து வரும், 13ஆம் தேதி முதல் இரவு, 8:50 மணிக்கு புறப்படும் ரயில்(06732), 10:30 மணிக்கு பாலக்காடு சென்றடையும் என, தெற்கு ரயில்வே தெரிவித்துள்ளது.